Nandriaka ny ra tao an-tampon-tanànan’i Vohipeno ny harivan’ny alarobia teo. Jiolahy miisa 15 mirongo fitaovam-piadiana mahery vaika sy zava-maranitra no fantatra fa tonga nanafika mpandraharaha ara-toekarena iray tao an-toerana. Ity farany izay manana magazay iray lehibe mivarotra entana madinika sy entana maro samihafa. Tsy tao an-toerana ilay mpandraharaha tamin’ny fotoana nidiran’ireo jiolahy tao amin’ny magazay fa ireo mpiambina ny tanàna maro be no tao.

Mpiambina miisa roa noho izany no namoy ny ainy tamin’ny fandalovan’ireo tsy mataho-tody tao raha toa naratra mafy ny efatra ambiny. Ireto farany izay tsy nety nilaza ny toerana misy ny sefon’izy ireo rehefa nanontanian’ireo olon-dratsy. Nirefodrefotra noho izany ny poa-basy ka namoy ny ainy avy hatrany ireo roa ireo rehefa nahazo ny faritra mahafaty ny bala. Ny ambiny kosa naratra mafy. Araka ny fanambaran’ny loharanom-baovao dia voatifitra teo amin’ny tongotra ny sasany tamin’ireo mpiambina ary ny sasany kosa voakapa famaky.

Tsy nihaona tamin’ilay mpandraharaha mihitsy moa ireo jiolahy. Tezitra noho izany izy ireo dia noraofiny ireo avokoa ireo vola rehetra mahatratra an-tapitrisany tao amin’ilay magazay izay tsy fantatra ny isany sy ny entana izay zakan’izy ireo. Misokatra ny fanadihadiana.

Laurena Nany