Nisokatra tamin’ny fomba ofisialy, omaly 29 aprily, teny Andohanimandroseza, ny tobim-pahasalamana faha-20 an’ny Marie stopes Madagascar (Msm) izay manatevina ireo efa misy manerana ny Nosy. Fahadimy izy raha ho an’ny eto an-drenivohitra. Natsangana eny an-toerana ity tobim-pahasalamana vaovao ity ho fanakaikaizana ny mponina, noho ny fahamaroan’ny olona mipetraka amin’iny faritra iny. Tafiditra ao anatin’izany ireo mpianatra mandranto fianarana eny amin’ny anjerimanontolo. Mampiavaka ity Msm vaovao ity amin’ireo rehetra efa misy, ny fisian’ny toerana antsoina hoe “ampela soa”. Toerana iray natokana ho an’ny tanora amin’ny fanomezana toro lalana mahakasika ny fahasalamana. Misy ao koa ny “espace beauté”. Ity tobim-pasalamana vaovao ity izay toby voalohany mitondra ny lokon’ny Msm vaovao, izay napetraky ny any Londres.

“Toy ny efa fahafantaran’ny olona ny Msm hatramin’izay dia hisy hatrany ny fandraisana ny reny sy ny zaza. Tafiditra amin’izany ny lafiny fandrindrana ny fiainam-pianakaviana, mitondra anjara adidy amin’ny fanomezana tolotra manerana ny Nosy ary mameno ny asan’ny ministeran’ny Fahasalamam-bahoaka satria ny Msm manampy amin’ny fanabeazana aizana maharitra”, hoy Tovo Ranaivomino, tale ara-barotry ny Marie stopes Madagascar.

Laurena Nany