Raha nangingina ny resaka famonoana olona amin’ny alalan’ny kibay misy fantsika (bois rond) tao ho ao dia hitady hahazo vahana indray izany amin’izao fotoana izao. Ramatoa iray indray no lasibatry ny lehilahy iray nilanja ity hazo ity, ny harivan’ny talata, teny Androndra. Nirava avy niasa hamonjy fodiana ity vehivavy ity no nosakanan’ny tovolahy iray tamin’io fotoana io. Norahonany hanome ny zavatra rehetra teny aminy ilay vehivavy fa raha tsy izany dia hovonoiny. Natahotra ny ho faty izy ka natolony ilay olon-dratsy avokoa ny entana teny aminy. Anisan’izany ny peratra volamena sy ny vola ary ny finday. Tsy nionona tamin’izany anefa ilay mpanendaka fa mbola novelesiny kibay misy fantsika teny an-tanany ny lasibatra. Naratra mafy ary torana tsy nahatsiaro tena vokatr’izany ity farany ka olona sendra nandalo no nahatsikaritra azy nitsirara teo amin’ny tany sy nitondra azy tany amin’ny hopitaly. Fotoana maromaro nahatongavany teny amin’ny toeram-pitsaboana vao niverina ny ainy ka tamin’izany no nitantarany ny nanjo azy. Efa mandeha ny fanadihadiana.

Laurena Nany