Nahery vaika ny fifandonana teo amin’ireo zandary mpanara-dia sy ireo dahalo tany Tsiroanomandidy, ny alin’ny 23 jona lasa teo. Dahalo miisa 40 nitondra basim-borona sy fitaovam-piadiana samihafa no nanafika tao amin’ny renivohitry ny kaominina Kiranomena tamin’io alina io. Nirefodrefotra ny poa-basy  ary lasa ny omby 20 isa. Nampandre  ny mpitandro filaminana avy hatrany ny fokonolona raha vao niala ny tanàna ireo olon-dratsy. Taorian’ny fizahana natao dia niroso tamin’ny fanarahan-dia ireo zandary izay nampian’ny fokonolona. Vao nifanehitra anefa ny roa tonta ora vitsivitsy taty aoriana dia tsy nisy alaharo alaharo fa ny basy avy hatrany no niresaka. Mafy ny fifandonana ka maty lavon’ny balan’ireo dahalo ny zandary iray kilasy faharoa izay miasa any amin’ny borigady Kiranomena. Efa eo am-pelatanan’ny komanda ny borigady ny basy kalachnikov nampiasan’ilay zandary namoy ny ainy. Nandray ny andraikiny avy hatrany ny Cirgn Antana vao naheno ny trangan-javatra ka nidina any an-toerana ny 24 jona teo, tamin’ny 5ora sy sasany hariva hijery akaiky ny raharaha miaraka amin’ny mpitandro filaminana 20 haka ny razana. Mitohy ny fanadihadiana.

L.N