Mitohy hatrany ny herisetra ataon’ny mpitandro filaminana amin’ny madinika. Mpirahalahy indray no namoy ny ainy noho ny hetraketrak’ireto voalohany, tany amin’ny alan’ny Tampolo, any Rantolava, kaominina Ampasina-Maningory, distrikan’i Fenoarivo Atsinanana, ny 21 jona lasa teo. Nandeha nitady kitay handrahoana sakafo tany amin’izany ala izany izy mirahalahy no nifanehitra tamin’ny zandary miandry ity ala ity, izay marihina fa ala arovana. Nolazain’ireo mpitandro filaminana fa mpangalatra hazo tao anatin’ilay alan-javaboahary  izy ireo ka tsy nisy fanadihadiana fa basy avy hatrany no niresaka. Norarafan’ireo zandary tifitra variraraka ka maty tsy tra-drano izy mirahalahy ireo.

Manoloana ity toe-javatra ity dia nampiaka-peo ny havan’ny niharam-boina sy ny fokonolona any amin’ny kaominina Ampasina-Maningory, taorian’ny fandevenana ny maty, ny zoma teo. Nilaza tsy hipetra-potsiny izy ireo satria tsy natao hamono mpaka kitay ny zandary. Tokony ho fisamborana na tifi-danitra no natao ary tokony nampandalovina fanadihadiana aloha izy roalahy.

Laurena Nany