Maty tsy tra-drano ny lehilahy iray very omby miisa 4 , izay monina any Mandabe Mahabo rehefa nisy namono noho ny disadisa nateraky ny halatr’omby. Nangataka ny fokonolona hanampy azy mba hitady ny fananany izy. Nahangona 21 lahy izy tamin’izany ary roso tamin’ny fanarahan-dia izy rehetra. Tonga tany Mandabe ry zareo ary nahatsikaritra fa nifarana teo akaikin’ny valan’ny mpanao dabok’andro iray ny dian’omby. Rehefa nojerana akaiky sy natao ny fanavahana dia tao tokoa ireo omby 4 very. Indrisy anefa fa nisy namono antsokosoko izy ny alina. Nokapaina tamin’ny famaky ny fihirifany no sady notsatoana lefona teo amin’ny kibony havanana. Very tamin’izany ihany koa ny basim-borona tena aminy. Efa eo ampelatanan’ny mpitandro filaminana ny raharaha sy ny fanadihadiana saingy tsy mbola nisy olona voasambotra aloha raha ny fampitam-baovao avy amin’ny zandary. Ny tranga toy izao anefa no mahatonga ny fifamonoan’ny samy vahoaka ifotony izay mateti-piseho tato ho ato. Fantatra mazava mantsy ny ankamaroan’ireo mpaniraka ny dahalo saingy mahitahita izy ireny no sady sahy mamono olona ka tsy misy sahy mikitika ary izy ireo indray no mampihorohoro ireo voatafika sy very fananana. Misy lafiny tsara ihany indraindray ny fomba fiasan’ny mpitandro filaminana sasany izay tonga dia mitifitra sy mandripaka ireo voaporofo fa tena dahalo.

Dom