Tsy taolan-dava intsony no nalain’ireo mpamaky fasana tany Ankazobe fa razana iray manontolo mihitsy. Fasana roa no nisy nanafika ka ny voalohany nahaverezana faty 2 ary ny faharoa kosa dia nentin’ireo jiolahy ny faty 4. Tao amin’ny kaominina Ambohitromby no nitrangan’izany saingy tamin’ny fokontany samihafa tsy dia mifanalavitra loatra kosa. Tsy nisy tratra ireo mpamaky fasana ary mbola eo am-panaovana ny fikarohana ny zandary. Avy eny Ambohimangakely sy Manjakandriana ary Andriampamaky izany ny mpamaky fasana dia lasa nitodika any Ankazobe indray. Ankoatra ireo tratra ambodiomby teo ampanokafana fasana sy ireo mpitondra taolam-paty dia matetika tsy tratra izany ny mpamaky fasana. Tsy mbola sahy mamoaka ny tsiambaratelon’ity resaka halatra taolam-paty sy vaky fasana ity rahateo ny Fanjakana malagasy fa saika mionona amin’ny resaka tombatombana sy honohono fotsiny ny vahoaka. Na ny mpitandro filaminana sy ny fitsarana aza dia tsy manana fanampim-baovao mazava sy feno mahakasika ny tena antony hisian’ny halatra taolam-paty sy ny mpividy izany ary ny hampiasana azy. Mifarana amin’ny fanagadrana ireo mpitondra taolana sy mpamaky fasana ny fanadihadiana dia tsy misy tohiny intsony.

Dom