Teo an-tampon-kandriny mihitsy no voatifitra sy niantefan’ny bala ka maty tsy tra-drano ny lehilahy iray tany Mandritsara.  Fanafihan-jiolahy ity nitranga ity ary nampiasa basy sy nanao fanamiana miaramila ireo mpanafika. Ankoatra ny halatra dia io namono nahafaty ny tompon-trano io ihany koa ireo jiolahy. Haingam-piasa ny mpitandro filaminana tamin’ny fanadihadiana sy ny fikaroham-baovao ary nanampy betsaka rahateo ny fokonolona ka efa misy olona 3 voarohirohy amin’ity raharaha ity no voasambotra. Fantatra fa vehivavy ny iray tamin’ireo jiolahy azo sambo-belona ireo. Mbola misy namany maro ihany koa anefa miriaria any ary karohina fatratra hatramin’izao. Ny mahagaga any amin’ny toerana lavitra dia ny fomba ananan’ny olona basy. Manana basim-borona avokoa farafaharatsiny ny sivily rehetra nefa tsy misy toerana manokana fivarotana izany any. Midika io tranga io fa misy tambajotra fampidirana basy antsokosoko ary mbola tsy mety tratra eto Madagasikara. Tsy mahagaga raha tonga eny am-pelatanan’ny dahalo sy jiolahy ireny fitaovam-piadiana mahafaty ireny.

Dom