Mpisoloky miisa 7 no voasambotry ny polisy ao Toamasina. Maka volan’olona amin’ny fanaovana varo-draikiraiky ireto olon-dratsy ireto ary efa manana tetikady mazava hanatanterahana izany. Milaza ho mpibizina vato sarobidy sy merkiora izy ireo mba hamitahany ireo lasibatra. Misy mihitsy olona miendrika vazaha mpiray tsikombakomba amin’izy ireo ary mody mijoro vavolombelona amin’ireo hosolokiana fa efa mpividy safira sy merkiora matetika ary afa-po. Roboka ireo tsy mahalala ka mividy lafobe. Ny merkiora moa dia ranon-javatra tsy azo atao anaty tavoahangy mangarahara fa atao anaty volotara ngezabe sy goavana na ihany koa anaty tavoahangy mifono be ka tsy hita izay ao anatiny. Rehefa tena ampiasaina izy io vao azo sokafana ka amin’izay fotoana izay vao tonga saina ireo mpividy fa voasoloky. Ho an’ny safira indray dia vakin-tavoahangy miloko manga no mody namboamboarina haka endriky ny vatoteky ka io no amidy lafobe. Efa amam-bola ireo mpisoloky ireo no nanao io asa ratsy io ary efa maro ny voa sy nitaraina. Tratra ihany anefa izy ireo rehefa nanaovan’ny mpitandro filaminana velam-pandrika. Anisan’ny notsindrian’ny polisy mafy ny tokony hampiharan’ireo orinasa misehatra amin’ny fifandraisan-davitra ny fanapahana avy hatrany ny laharan’ireo “puce” tsy mbola misy anarana. Hatramin’izao mantsy dia mbola betsaka ny mpisoloky mampiasa ny fandefasana vola amin’ny telefaonina.

Dom