Nahery vaika ny asan-dahalo nitranga tany Iakora omaly vao maraim-be. Tamin’ny 6 ora izy ireo no tonga tao amin’ilay tanàna. Miisa 120 mahery ireo dahalo ary avy hatrany dia nanao tifitra variraraka sy nanangona ny omby. Tsy nanaiky nolembenana anefa ny mponina ary niaro tena sy nanao ny fanarahan-dia avy hatrany. Nanao tampody fohy ireo malaso ka raikitra ny fifandonana mahery vaika. Raha ny tatitra voaray dia niampatrapatra ny faty taorian’ny fifampitifirana ka Jama 8, fokonolona 10 ary dahalo 2 no lavo. Tsy nisy tafaverina ny omby ary tsy sahy nanohy ny fanarahan-dia intsony ihany koa ny tao an-tanàna.  Efa nandray ny andraikiny nanao ny fanenjehana ihany koa ny mpitandro filaminana saingy tsy mbola fantatra izay niafaran’izany. Ny jama moa dia olona sivily mahafehy tsara ny fomba fiady ary manana ody mahery tsy laitran’ny dahalo. Ny Jama no karamain’ny tompon’omby hiambina ny omby.

Tampoka sy tsy nisy nanam-po ity fanafihana mahery vaika ity satria efa ela tsy nahenoana izany andian-dahalo an-jatony izany tany amin’ny faritra Atsimo. Misy rahateo ny fametrahana ilay andian-tafika manokana hiady amin’ny asan-dahalo izay nampilamindamina kely ny tsy fandriam-pahalemana tany an-toerana. Ankoatra ireo dia efa tafapetrapetraka avokoa ny dinabe sy ny kalaony izay ahafahan’ny vahoaka miaro tena manohitra ny fanafihan-dahalo. Efa maro ireo malaso nitondra faisana tamin’io lamina napetraka hitandroana ny fandriam-pahalemana io. Nampiseho anefa ity fanafihana tao Iakora ity fa nanova sy nanamafy ny fomba fiadiny ihany koa ireo dahalo.

Dom