Vaky kodiarana dia nijanona kinanjo notafihan’ny jiolahy ny taksiborosy iray tany Ambohimpihaonana distrikan’Ambatolampy. Noteren’ireo mpanafika niditra tany amin’ny lalana mankany Andranomanelatra io fiara io avy eo ka tany no nendahin’izy ireo ny mpandeha. Vola 1 tapitrisa latsaka kely miampy firavaka sy fitaovana elektronika maro no very tamin’izany. Efa mandeha ny fanadihadiana ary misy tamin’ireo lasibatra no miahiahy ny mpamily ho tao ambadiky ny raharaha. Raha tsy nijanona teo mantsy ilay fiara tsy voatafika toy izao. Ny zandary irery ihany anefa no afaka mamaritra mazava ny tena ao amabadik’ity fanafihana ity. Tsy mbola nisy tratra ireo mpanafika na dia efa manao izay ho afany amin’ny fikarohana aza ny mpitandro filaminana. Fetsy rahateo ireo olon-dratsy satria nentiny tany ankodahoda ireo lasibatra mba hanamorana ny fitsoahana. Tsy mandry mihitsy ny tany any amin’ny faritra Vakinankaratra tato ho ato satria manomboka miseho lany avokoa ny karazana heloka bevava rehetra. Miainga amin’ny halabotry sy vaky trano izany ary mitohy amin’ny fanafihan-dahalo sy ny fanakanana fiara. Tsy misy mihevitra ny hisian’ny fifandraisana amin’ny raharaha politika kosa anefa fa toy ny tsy fandriam-pahalemana tsotra ihany no mitranga.

Dom