Ambararatabe – Mampiasa masolavitra ny dahalo rehefa hanafika
Efa maty paika ny fanafihana ary fantatry ny dahalo amin’ny antsipirihany ny fiaim-piainan’ny tanàna hotafihin’izy ireo. Manaporofo izany ny fampiasana masolavitra izay hahafahana mitily mialoha ny zava-mitranga rehetra alohan’ny tena hanaovana ny fanafihana. Tany Ambararatabe, distrikan’i Tsaratanàna dia saron’ny mpitandro filaminana ny toby fieren’ny dahalo rehefa nisy ny fanadihadiana lalina sy ny fisavana natao. Hitan’ny zandary ny toerana fanatobiana ny omby halatra ka nirotsahan’izy ireo tao. Omby miisa 24 no tao ary nahitana masolavitra fampiasan’ny dahalo ihany koa. Tsy nisy tratra kosa ireo malaso ary heverina ho efa nitsoaka mialoha vao nahatazana ny fiavian’ny mpitandro filaminana. Efa noroahina nampidirina am-bala sady arovana ireo omby ireo ary nanaovana antso izay mety ho tompony. Manaporofo ity tranga iray ity fa tsy kisendrasendra ny fanafihan-dahalo fa tena efa misy lamina maty paika sy fiomanana mialoha hatrany. Hatramin’ny toerana hasiana ireo omby halatra mandra-pivarotana azy ireny aza dia efa milamindamina tsara avokoa.
Dom