Mananjary – Trano 44 nisy nandoro
Lavenona sisa no niafaran’ny tanàna kely iray any Mananjary fa may avokoa ny trano rehetra. Vokatr’izany, fianakaviana 150 no very fananana sy tsy manan-kialofana tanteraka. Araka izany, 44 ny fitambaran’ny trano may tamin’io fotoana io. Heverin’ny mponina fa niniana nodorana mihitsy izy ireo satria araka ny fantatra dia trano iray tsy misy mipetraka no niandohan’ny afo. Hatramin’ny trano fitehirizam-bokatra aza may avokoa. Miisa 10 ireo fitehirizam-bokatra ireo ary levon’ny afo tanteraka. Izany hoe tsy manan-kohanina intsony ny mponina rehetra. Fantatra ihany koa fa efa fanindroany izao tany an-toerana no nisy haintrano tamin’ity volana septambra ity. Manao antso avo amin’ny tompon’andraiki-panjakana ny mponina noho izany mba hitondra fanampiana sy famonjena maika fa tena latsaka an-katerana tanteraka. Mahalasa saina ny maro mihitsy ity haintrano sy doro ala goavana nisesisesy tato ho ato ity. Toa misy ifandraisany avokoa nefa amin’ny toerana samihafa izay tsy misy fifandraisany mihitsy izay mitranga. Ny azo antoka dia antony roa no mahatonga ireny firehetana ireny. Voalohany dia ny tsy fitandremana ary faharoa kosa ny sotasota. Efa misy ihany ny fanentanana ataon’ny Bngrc sy ny minisiteran’ny Tontolo iainana mba hisorohana ny loza ateraky ny afo saingy toa misy karazan’olona tsy te hahalala izany mihitsy.
Dom