Tsaramasoandro – Andolofotsy – Fandrahonana ben’ny tanàna
Ny 26 Septambra lasa teo, tokony ho tamin’ny 04 ora hariva dia norahonan’ny lehilahy iray izay monina ao Tsaramasoandro, Kaominina ambanivohitr’Andolofotsy ny ben’ny tanàna. Sady nanompa no nilaza fa hampiditra dahalo hanakorontana ny tanàna iray manontolo izy. Avy hatrany dia nampitonian’ny zandary nanatri-maso ny fon’ity farany ka nalaminy ny resaka, kanefa noho ny tsy faneken’ity lehilahy ity ny fandaminana dia voatery nandray ny andraikiny ny mpitandro filaminana. Tao anatin’ny fifanjevoana anefa dia voakitika tsy nahy ny basin’ilay zandary ka nipoaka ary nahavoa ny tongotr’ilay mpanakorontana. Mbola afaka nandositra ihany anefa izy taorian’izany. Nisy vavolombelona nanatrika moa izany trangan-javatra izany, izay tsy iza fa ny rahalahiny ihany saingy nitazam-potsiny izy fa tsy mba nanampy akory ary nitsoaka niaraka taminy. Nisy ny fepetra noraisina manoloana izany ka avy hatrany dia nandray fepetra ny mpitandro filaminana ary nanenjika azy roalahy. Tratra teny am-pitsoahana izy ireo ka notazomina avy hatrany any amin’ny polisy, ilay naratra kosa nentina notsaboina tany amin’ny Csb II izay akaiky indrindra. Ny polisy any Andolofotsy no misahana ny famotorana ny raharaha.
Anna Ra.