Miaina ao anatin’ny tsy fahampian-drano ny faritra maro eto Madagasikara ankehitriny noho ny tsy firotsahan’ny orana. Antony maro no mahatonga izany. Ao ohatra, ny doro tanety, ny karazana entona maro isan-karazany ary ny fanapahana ny ala tsy amin’ny antony nefa tsy manana finiavana hanolo amin’ny alalan’ny fambolena zanakazo. Manoloana izany dia mahatsiaro ho manana anjara biriky amin’ny fanarenana ny fahasimban’ny tontolo iainana ny vondron-tafika ao Antsirabe. Izy ireo no nisantatra ny taonan’ny fambolen-kazo tamin’ity taona 2017 ity tao Antsirabe, izay renivohitry ny faritra Vakinankaratra. Zanakazo miisa 2 000 fototra no nisantaran’ny miaramila izany. Ny tafika rehetra tao Antsirabe no nanatanteraka izany  tamin’ny toerana telo samihafa dia ny tao amin’ny Akademia sy ny Ensoa ary ny Tobin’ny Zandary Antanimenakely. Nambaran’i Kolonely Ralaibeza, Lefitry ny komandin’ny Akademia miaramila, izay nitarika ny hetsika fa « fandraisana anjara amin’ny fiarovana ny tontolo iainana manodidina azy ireo izao hetsika izao, ary efa adidy fanaon’izy ireo isan-taona ihany koa. Santatra ihany izy ity, satria mbola hitohy any amin’ireo tany miaramila eran’i Vakinankaratra, toy ny any Tongafeno sy ny Garan’ny raopilanina». Ho azy ireo dia efa misy mihitsy ny miaramila natao hikajy izay hazo nambolena mba tsy ho fombafomba fotsiny izany. Marihina fa omaly ko a no nisokatra ny taom-pambolen-kazo ho an’ny faritra Vakinankaratra sy ny sampan-draharahan’ny Rano sy ny ala, izay natao teny Andraikiba.

Tahirisoa