Mahazo laka ny asa fanolanana sy ny famonoana olona ao an-tampon-tananan’i Toamasina. Polisy iray sy vehivavy miisa roa no hita faty tany an-toerana ary voamarina fa nisy namono izy ireo. Vehivavy iray 32 taona izay mpampanofa vatana no hita faty tsy lavitra ny trano fonenany ny alin’ny zoma 26 jona hifoha 27 jona lasa teo tao Andranomadio 11/14. Handeha hamonjy fodiana izy raha niharan’ny hetraketraka izao. Tamin’ny fizahana nataon’ny mpitsabo dia fantatra fa naolana ary novonoina ity vehivavy ity. Vehivavy iray hafa 20 taona any ho any ihany koa no nisy namono tamin’ny fomba mahatsiravina ny alin’ny 25 jona lasa iny tao Ambalamanasy izay tsy lavitra ny seranam-piaramanidina. Raha ny loharanom-baovao voaray dia avy namonjy fitokanan-trano io tovovavy nisy namono io. Voamarina ihany koa fa voaolana. Polisy iray efa tsy hita nandritra ny telo andro no hita faty tao Ivoloina ny andron’ny 26 jona. Tamin’ny fizahana nataon’ny dokotera dia fantatra fa nisy namono ity mpitandro filaminana ity. Nahitana ratra be dia be ny vatany tamin’ny fizahana natao taminy. Misokatra ny fanadihadiana ataon’ny mpitandro filaminana.