Raha nangingina ny fikapohana amin’ny « bois rond » tato ato dia niverina indray izany ankehitriny ary efa mampihorohoro eraky ny tananan’Antananarivo ireo olon-dratsy fa tsy mijanona amin’ireo toerana nitrangana izany intsony. Ary tsy eto an-drenivohitra ihany fa efa mipaka hatrany Toamasina ny fampihorohoroana amin’ny « bois rond ». Raha ny eto an-drenivohitra dia olona miisa roa no lasibatra ireo olon-dratsy ny harivan’ny talata tamin’ny toerana roa samihafa. Tovovavy manodidina ny 25 taona ny iray izay novelesin-dry zalahy teny Andranomena raha namonjy fodiana avy niasa. Ny iray kosa lehilahy 32 taona teny Ambatobe ary samy voa teo amin’ny loha sy tarehy izy roa ireo. Efa saika namoy ny ainy ireo lasibatra ireo raha tsy nentina haingana teny amin’ny hopitaly. Araka ny filazan’ny mpitsabo mantsy dia efa tena natahorana ny ain’izy ireo tamin’ny fahatongavan’ny roa tonta teny an-toerana. Tany Toamasina indray dia lehilahy nandeha kodiaran-droa no lasibatr’ireo tsy mataho-tody teny amin’ny fokontany Ankirihiry ny harivan’ny alahady teo. Vokatry ny vely mafy be nahazo azy dia nianjera avy eny ambonin’ny môtô mihitsy ilay lehilahy ary nentin’ireo jiolahy nandositra kosa ny môtô. Tsy misy ahiana kosa ny ain’io lehilahy io.

L.N