Potika avokoa ny tanimbary. Velo-taraina ireo mpamboly ao amin’ny kaominina Manapatrana, distrikan’Ikongo amin’ny afitsok’ireo teratany sinoa mpitandraka volamena satria misy fiantraikany goavana amin’ny asa fambolena izany. Asa fambolena izay tena asa iveloman’ny ankamaroan’ny mponina ao an-toerana. Taorian’ny fitarainana voarain’ny lehiben’ny distrika dia nidina teny ifotony ity farany sy ny mpitandro filaminana nijery akaiky ny zava-misy. Tamin’ny fanadihadiana natao dia fantatra fa tsy ara-dalàna ny fitrandrahana ataon’ireo teratany sinoa nandritra ny fotoana maro nanaovan’izy ireo ny asa fitrandrahana volamena tao amin’io toerana io. Noho izay antony izany dia nandray ny andraikiny ny lehiben’ny distrika amin’ny fampitsaharana ny asa fitrandrahana. Araka ny vaovao avy any an-toerana dia nasiana zandary miambina mihitsy io toerana io mba ialana amin’ny mety ho fihoaram-pefy. Fa hatramin’ny oviana anefa? Tsy vao sambany mantsy io fitrandrahana tsy ara-dalàna ataon’ny vahiny io. Fa any amin’ny faritra atsimon’ny Nosy iny anefa dia vita vita ho azy, na dia misy aza ny fitarainana sy  ny tsy rariny ataon’ny mpitrandraka, ary miverina amin’ny laoniny ihany izany aty aoriana.