Tokantrano miisa telo indray no nasesin’ireo jiolahy notafihana tao amin’ny distrikan’Anrivonimamo. Dimy lahy nirongo fitaovam-piadiana mahery vaika no tonga tao Manjato, kaominina Ambohitrambo ny alin’ny alatsinainy 3 aogositra tamin’ny 8ora sy sasany nandroba ny mponina tao. Novakian’ireo jiolahy ny varavarana ary nanapoaka basy izy ireo  raha vao tafiditra tao  amin’ireo  trano ho robainy sady nandrahona ireo tompon-trano hamoaka vola. Lelavola mitentina 800 000 ariary lasa tamin’ireo trano miisa telo ireo niaraka tamin’ny firavaka volamena.

Nanohitra kosa ny rangahy iray tompon-trano tamin’ireo telo voatafika ka naratra mafy tamin’izany ny jiolahy iray. Tsy nampoizin’ireo ny zavatra nitranga. Vao variana kely mantsy ireo olon-dratsy dia  naka angady ilay lehilahy ary avy hatrany dia novelesiny tamin’ ilay jiolahy. Nandositra ohatry ny tsy teo izy ireo saingy tratran’ny zandarimaria tao Ambohibary io jiolahy naratra io tamin’ny fanarahan-dia nataon’izy ireo. Noho ny ratra mafy nahazo mantsy dia tsy afaka nitsoaka tahaka ireo namany ity farany. Mitohy ny fikarohana ireo namany.