Mirongotra indray ny asan-jiolahy amin’iny lalam-pirenena faharoa iny tato ato. Fiara vaventy miisa roa mpitatitra entana no indray notafihan’ny jiolahy tamin’iny herinandro lasa iny. Teny amin’ny tanàna antsoina hoe Sandranetana, kaominina Fanandrahana, ao anatin’ny distrikan’i Toamasina faharoa no nisehoan’ny fanafihana voalohany ary tao Vohitsara Marofody, kaominina Ambaninony, distrikan’i Brickaville ny faharoa. Araka ny vaovao voaray dia nanao sakan-dalana ireo jiolahy ka voatery nijanona ireo fiara lehibe ireo satria tsy afaka niala. Vao tafajanona ireto fiara dia  nivoaka avy tao anaty kirihitra ala ireto jiolahy niaraka  tamin’ny basy mahery vaika sy zava-maranitra nandrahona ireo mpamily fiara. Tahotra ny ho faty dia nanaiky izay sitrapon’izy ireo ny mpamily. Kamiao « semi-remorque » no norobain’ireo jiolahy ka lasa tamin’izany ny entana toy ny lafarinina miisa 28 lasaka sy ny kodiarana fiarakodia miisa roa izay handeha hanaovana fanavotana taksiborosy iray tavela eny an-dalana tao Ranomafana. Soa ihany fa tsy nisy ny aina nafoy na naratra. Efa eo am-pelatanan’ny mpitandro filaminana ny raharaha.

Laurena Nany