Nisesisesy ny lozam-pifamoivoizana ny faran’ny herinandro teo. Olona maro no namoy ny ainy ary maro ihany koa ireo naratra mafy vokatr’ izany. Tamin’iny lalam-pirenena voalohany iny dia miisa efatra ireo naratra mafy noho ny tsy fitandreman’ireo mpitondra môtô, omaly atoandro, tokony tamin’ny 3 ora tany ho any. Araka ny fanambaran’ny loharanom-baovao dia kodiaran-droa marika Jog nanao taingin-droa no nandona mpandeha tongotra teny amin’ny sisin’ny arabe. Araka ny voalaza dia mamo ireo nitaingina môtô ka tsy nahafehy ny familiana intsony ary nifatratra tamin’ireo olona ireo. Vokany, olona miisa efatra naratra mafy ka ny roa amin’ireo mpitaingina môtô. Nentina namonjy ny toeram-pitsaboana avy hatrany izy ireo. Tamin’ny fanambaran’ny mpitsabo dia tsy misy ahiana ny ain’izy ireo.

L.N