Mirongatra tsy misy ohatra izany ny tsy fandriampahalemana ao amin’ny distrikan’i Fenoarivo Atsinanana amin’izao fotoana izao. Tokantrano iray tao Sahavola indray no nidiran’ireo jiolahy an-keriny ny faran’ny herinandro lasa teo. Fito lahy nirongo fitaovam-piadiana mahery vaika no fantatra fa tonga nanafika io tokantrano io ary nandrahona ireo tompon-trano hamoaka ny vola rehetra. Manoloana izany dia tsy nisy sahy nanohitra ireo olona tao an-trano ary lasa ny vola iray tapitrisa ariary.

Tamin’izany fanafihana izany dia nitifitra ireo jiolahy ka naratra mafy voan’ny bala teo amin’ny tanany ny olona iray tao an-trano. Tsy nisy kosa ny aina nafoy ary nandositra ohatra ny tsy teo ireo mpandroba rehefa azon’izy ireo izay notadiaviny. Efa nisy ny fanarahan-dia nataon’ny zandary fa mbola tsy nisy vokany izany hatreto. Mitohy ny fikarohana.