Ny marainan’ny andro voalohany tamin’ny fanadinam-panjakana bakalorea dia nisy sahady ny mpiadina tratra nanao hosoka nandritra ny taranja filôzôfia tao amin’ny foiben-toeram-panadinana Lisea Jacques Rabemananjara. Mpiadina miisa telo mianadahy no voatery navoakan’ny lehiben’ny ivon-toeram-panadinana bakalorea sady nasaina nody avy hatrany. Ireto farany izay sarona nitondra tahirin-kevitra nandritra ny fiatrehana ny taranja filôzôfia. Araka ny filazan’ny mpiadina iray izay nanatri-maso ny raharaha dia nandeha nivoaka tany amin’ny toeram-pivoahana ny iray tamin’ireo mpiadina tratra no niditra ny efitranom-panadinana ny lehiben’ny ivon-toeram-panadinana nanao fisavana ireo mpiadina. Tratra nandritra izany ny kahie nisy oha-pitenenana sy ny taratasy misy lesona izay nafenina tao ambany latabatra. Bakalorea ao anatin’ny lenta mitovy sy mangarahara no tanjona. Noho izany dia nasaina nanao fitantanana an-tsoratra ilay mpiadina izay niray latabatra tamin’ilay tratra nanao hosoka. Andrasana izay fanapahan-kevitry ny tompon’andraikitra misahana ny fanadinana bakalorea mahakasika io tranga io.

Nilamina na tsy nisy Seces aza

Raha ny eto an-drenivohitra manokana no resahana dia tsy nisy olana ny tsy fandraisan’ny Seces andraikitra tamin’ny fanadinana bakalorea. « Raharahan’ny Seces manokana ny tsy fandraisana ny andraikitra tamin’ny fanadinana bakalorea fa ity raharahan’ny fanjakana sy adidy masina amin’ny tanindrazana ka tsy maintsy efaina », hoy i Anselmo Andrianandrasana, lehiben’ny ivon-toeram-panadinana tetsy amin’ny Ceg Antanimena. « Nizotra antsakany sy andavany araka ny fieritreretana sy toromarika azo nandritra ny fampiofanana ny fanadinana bakalorea na dia teo aza ireo mpiadina izay nisy tsy salama noho ny rarin-tsaina. Fa efa nisy kosa ny fanaraha-maso nataon’ny mpitsabo ka nahatontosa ny fanadinana soamantsara ihany ireo mpiadina», hoy hatrany izy.

Efa vonona daholo ireo mpiadina ary tonga ara-potoana ny marainan’ny omaly alatsinainy nandritra ny taranja filôzôfia. Miisa 722 ireo mpiadina nanao fanadinana tao amin’ny foibem-panadinana Ceg Antanimena. 29 kosa ireo tsy tonga niatrika ny fanadinana. Ho an’ny foibem-panadinana Ceg 67ha kosa dia maherin’ny 500 ireo mpiadina ary miisa 92 ireo tsy tonga.

Mahajanga

Ho an’i Mahajanga dia tamim-pilaminana tanteraka no niatrehan’ireo mpiadina ny fanadinana na dia teo aza ny fitaintainana teo amin’ny mpiadina sy ny ray aman-dreny noho ny fitokonana nataon’ny mpampianatra mpikaroka. Miisa 18 381 ireo mpianatra niatrika ny fanadinana bakalorea tao amin’ny Faritra Boeny izay nozaraina tamin’ny ivon-toeram-panadinana 33. Nitombo 12,41% ny tahan’ny mpiadina amin’ny bakalorea ankapobeny raha toa ka nihena 12,83% ny tahan’ny mpiadina amin’ny sampana teknika tamin’ity taona 2015 ity. Nanomboka tamin’ny 6 ora sy sasany ny fiantsoana ny anaran’ny mpiadina. Tamin’ny 7 ora kosa vao nozaraina ny taratasim-panadinana, ary tamin’ny 7 ora sy sasany vao nomena ny laza adina ka nanomboka ny fanadinana. Ny taranja Filôzôfia no nanombohana ny fanadinana ny alatsinainy teo.

Laurena Nany