Taorian’ny fanafihana ny toeram-pivarotana iray teny Amborovy sy ny trano fivarotana mpamongady iray teny amin’ny Sotema dia notafihan’ny andian-jiolahy mirongo fitaovam-piadiana ihany koa ny orinasa Star ao Mahajanga. Tamin’ny faran’ny herinandro no nisehoan’izany. Jiolahy miisa dimy niaraka tamin’ny basy miisa telo sy hazo vaventy ary zava-maranitra no voalaza fa tonga nanafika izany orinasa manodidina tamin’ny roa maraina tany ho any.

Vao niditra ny faritra ny orinasa ireo olon-dratsy dia novelesin-drizalahy tamin’ilay hazo vaventy ireo mpiambina miisa roa tao an-toerana ka torana tsy nahatsiaro tena ary naratra mafy. Nidiran’izy ireo an-keriny amin’izay tao amin’ilay orinasa ary vantany  vao tafiditra tao dia novakian’ireo olon-dratsy ny vata fitehirizam-bola, ka lasa ny vola manodidina ny 60 tapitrisa ariary. Nampandre ny mpitandro filaminana ny manodidina vao nahare ny poa-basy nirefodrefotra nataon’ireo jiolahy. 20 minitra dia tonga teny an-toerana ireo zandary hijery ifotony ny zava-misy saingy efa lasa lavitra ireo mpanafika. Misokatra ny fanadihadiana mahakasika ity raharaha ity. Mangataka ny fiaraha-miasa amin’ny fokonolona ihany koa ireo mpitandro filaminana ahafahana misambotra ireo jiolahy sy mametraka ny filaminana ao Mahajanga amin’ny firongotry ny tsy fandriampahalemana.

Laurena Nany