Ny faramparan’ny volana aogositra no hanao fitsidiam-paritra ny filoha mpanorina ny fikambana Hafari Malagasy Jean Nirina Rafanomezantsoa. Fanasana azony avy amin’ireo mpiandraikitra ny biraom-paritry ny Hafari Malagasy mba ho fananganana amin’ny fomba ofisialy ny fijoroan’ny fikambanana any amin’ireo faritra maro manerana ny Nosy. Toy izany ny ao amin’ny distrikan’i Mampikony, Port-Bergé, Antsohihy sy Mahajanga. Manaraka izay ihany koa ny ao amin’ny tapany Atsimo sy Atsinanan’ny Nosy toy ny ao Moramanga sy Toamasina. Araka ny fanazavana nomen’ny filohan’ny fikambanana dia tsy izy no nanitatra ny fikambanana fa ireo tany amin’ny faritra no nangataka ny hisian’izany any amin’ny misy azy ireo tsirairay avy. Neken’ny foibe ny fangatahana rehetra saingy nametraka kosa ny mpitarika fa tsy maintsy manaraka ary tsy afaka mivaona amin’ny fenitra napetraky ny fikambanana. Anisan’izany ny tsy maintsy hananganana vondrona ahitana olona 20 fara fahakeliny sy ny fananana tetikasa mazava.

N.F