Nitrangana hain-trano mahatsiravina ny tao amin’ny fokontany Anjaridaina, ao an-tampon-tanànan’ Ambolibe ny alin’ny zoma 28 aogositra lasa teo. Tsy fantatra mazava ny nahatonga ny afo fa tovolahy kely 13 taona no fantatra fa namoy ny ainy tamin’izany loza izany.

Araka ny fanambaran’ny loharanom-baovao, tsy tao an-tranon’ilay niharan-doza no nitranga ny hain-trano fa tany amin’ny fonenanan’ny sakaizan’ny zokiny. Araka ny vaovao voaray hatrany dia nandeha nijery lanonana izy sy ny zokiny ary ny sakaizan’ity farany ka rehefa nirava izany fety izany dia nandeha nivoaka namonjy alim-pandihizana indray ny zokiny sy ny sakaizany ka najanon’izy ireo tao an-trano irery ilay tovolahy. Tsy fantatra mazava ny tena niandohan’ny afo tao amin’ilay efitrano iray ambany rihana fa nisy gazy tao anatin’izany trano izany ka nanamora ny fipoahana sy ny firehetana. Resi-tory ihany koa ilay tovolahy kely ka tsy naheno ny firehetana.

Ny manodidina koa anefa tsy nahatsikaritra ny zava-niseho raha tsy efa nijoalajoala be ny afo  tamin’ilay trano. Niantso ny mpamonjy voina ihany ny fokonolona fa tsy afaka nanao ny asany fa simba ny kamiao mpitondra rano. Nifamonjenan’ny mponina ny namono ny afo saingy tsy tratra intsony ny ain’ilay zazalahy.

Laurena Nany