Nisesisesy ny lozam-pifamoivoizana nateraky ny  kamiao tamin’iny farany herinandro iny teto an-drenivohitra sy ny manodidina. Mpitondra kodiaran-droa iray no namoy ny ainy ary olona fito hafa no naratra nodomin’ izany fiara vaventy izany. Teny Andoharanofotsy no niseho ny loza voalohany ny marain’ny zoma lasa teo tamin’ny 7ora. Fiara tsy mataho-dalana iray nitondra masera no nofaohan’ny kamiao ka potika tsy nisy noraisina ilay 4×4. Masera miisa telo sy frera iray handeha hamonjy fotoam-pivavahana teny Analamahitsy indray naratra avokoa.

Ankizy miisa telo no naratra mafy teny amin’iny lalam-pirenena faharoa iny, ao amin’ny kaominina Carion ao anatin’ny distrikan’i Manjakandriana ny zoma iny ihany. Kamiao sy Sprinter indray ity nifandona ity. Araka ny fantatra dia nikasa hisongona fiara iray teo alohany ilay kamiao. Vantany vao tafahoatra izany anefa dia notsenain’ny fiara Mercedes Sprinter iray izay nifanohi-dalana taminy. Rangahy iray nitondra môtô lehibe kosa no maty tsy tra-drano rehefa nodomina kamiao tany Miarinarivo  ny faran’ny herinandro lasa teo. Araka ny fanazavana, kamiao nitondra vary milanja 8 taonina avy any Soavinandriana ity nifaoka azy ity.

L.N