Dahalo miisa roa no lavon’ny mpitandro filaminana ny alahady 30 aogositra teo, tamin’ny toerana roa samihafa. Ny voalohany izay nitranga tany Maintirano, tao amin’ny toerana iray antsoina hoe Mangotaka, fokontany Ambatovaky, kaominina Marohazo, tamin’ny 4ora tolakandro. Andian-dahalo miisa 10 nirongo fitaovam-piadiana no nangalatra omby miisa 56 tao an-toerana. Nisy ny fanarahan-dia ka raikitra ny fifandonana teo amin’ny roa tonta teo anelanelan’ny Marohazo sy Berefo. Dahalo iray namoy ny ainy nandritra izany ary iray hafa naratra fa mbola tafatsoaka. Tafaverina avokoa ny omby. Ny iray hafa tany Miandrivazo, tao amin’ny fokontany Ankilimahasoa, tokony ho misasak’alina tany ho any. Tsy fantatra ny isan’ireo dahalo, niaraka tamin’ny basim-borona no nandrobana ny omby roapolo. Nitovy ny paik’ady nampiasain’ireo olon-dratsy nandritra ireo fanafihana roa ireo. Nisy ihany koa ny fanarahan-dia nataon’ny mpitandro filaminana ka dahalo iray ihany koa no maty nandritra ny fifanjevona teo amin’ny roa tonta. Tafaverina ihany koa ny omby rehetra.