Teny an-dalana handeha hanafika ireo andian-dahalo no sendra ny ekipan’ny zandarimariam-pirenena izay manao fampandrian-tany. Raikitra ny fifandonana ka rehefa voa teo amin’ny feny ny iray tamin’ireo jiolahy dia tavela teo ny basy kalachnikov roa satria nitsoaka ity farany ka tafaporitsaka niaraka tamin’ireo namany.

Voalazan’ny lehiben’ny fileovan’ny zandary any an-toerana fa antony somary nanahirana azy ireo tamin’ny fanenjehana ireo dahalo ny fahamaroan’ny olona. Ny faran’ny herinandro lasa teo no nisehoan’ity tranga ity tao amin’ny kaominina Antanandava ao anatin’ny tapany avaratr’Ambatondrazaka.Marihina fa tsy vao izao akory no nisian’ny fanafihan-dahalo tany an-toerana sy ny manodidina araka ny nambaran’ireo mponina fa efa matetim-pitranga ka anisan’ny lasibatra matetika amin’izany ny omby izay miantoka ny fiveloman’ny olona. Nangataka ny mba hampitomboana ireo fitaovana enti-miaro ny fandriam-pahalemana toy ny môtô na ny fiara ny lehiben’ny fileovan’ny zandary mba hahafahan’izy ireo manafaingana sy manamora ny fahazoana ireo olon-dratsy.

Ange R.