Nitrangana lozam-pifamoivoizana tao Brickaville omaly alakamisy 3 septambra, tokony ho tamin’ny 4 ora sy sasany maraina. Fiara mpanao fitaterana, no nidona tamin’ny kamiao iray nijanona teo amin’ny sisin’arabe, toerana 16 kilaometatra tsy ahatongavana amin’ny tanànan’Brickaville. Vokatry ny dona mafy nihatra tamin’io fiara Sprinter io, dia namoy ny ainy ny mpamily antsoina hoe Randimbison Christian Flobert, 40 taona, nitondra izany fiara izany rehefa tonga teny amin’ny hopitaly Brickaville.

Nofain’ny tarika Black Nadia ho any Toamasina ity fiara sprinter ity ary niala tao Antananarivo ny harivan’ny alarobia 2 septambra 2015, ka olona sivy no naratra tao anatiny. Tsy naninona kosa ny lehiben’ny tarika,  dia ny mpanakanto Black Nadia. Marihina fa tao anatin’ity herinandro ity dia lozam-pifamoivoizana roa samihafa no niseho tao Brickaville, ka ny iray voalohany ny marainan’ny alatsinainy 31 aogositra lasa teo, ity faharoa indray ny alakamisy 3 septambra 2015. Ireo fiara niharan-doza dia samy marika Mercedes Sprinter mpanao fitaterana mpandeha avokoa, ary ny mpamily hatrany no nindaosin’ny fahafatesana tamin’izany.

ZOUZOUH Toamasina