Misongadina hatrany ny mpianatra mandranto fianarana eny anivon’ny sekoly katôlika. Antony mahatonga ny fahazoana vokatra tsara, hoy Mompera Ranaivoson Jules tale nasionalin’ny sekoly katôlika ny fahazoan’ireo mpampianatra sy ny mpanabe ny fiahiana ara-tsosialiny satria rehefa mahazo fanampiana izy ireo dia mazoto miasa. Izay indrindra no nahatonga ny fanamafisana ny fiaraha-miasa eo anivon’ny sekoly katôlika manerana ny Nosy sy ny CNaPS na ny tahirim-pirenena.

Nanomboka ny alatsinainy 31 aogositra lasa teo ary nifarana ny alakamisy 03 septambra  tetsy amin’ny Falda Antanimena ny atrikasa nasionalin’ireo talen-tsekoly rehetra ao anatin’ny Diosezin’Antananarivo. Lohahevitra ny hoe : « Sekoly katôlika miatrika ny ireo zo sy ny fitsinjovana ara-tsosialy ». Ny roa andro voalohan’ny atrikasa dia natokan’ny CNaPS nampahafantarana bebe kokoa mikasika ny atao hoe Fiahiana ara-tsosialy, ary ireo pitsopitsony sy ny dingana arahina amin’ny fahazoana fanampiana eny anivon’ny Tahirim-pirenena. Nahatratra 176 ireo talen-tsekoly tonga niofana tetsy amin’ny Falda Antanimena raha toa ka miisa 600 ireo sekoly katôlika miparitaka manerana ny diosezin’Antananarivo. Mbola misy moa ny dingana faharoa amin’ny fiofanana amin’ny herinandro ambony.