Tsy fantatra mazava hatreto na latsaka tsy nahy na nisy nandatsaka tao anaty lavan-drano ny rangahy iray 72 taona fa efa ny fatiny no hitan’ny fokonolona tao anatin’izany fakana rano izany, izay ao amin’ny tokontaniny ihany.  Sendra olona handeha hantsaka rano vao maraina no nahatsikaritra ny razana ny sabotsy teo, tao amin’ny fokontany Antsonasona, an-tampon-tananan’i Antalaha. Nijoro tsara tao anaty lavan-drano ny vatany tamin’ny fahitan’ny olona azy. Taitra tampoka ity farany raha nahita izany ka nikikiaka mafy. Vory lanona teo ny fokonolona ary akory ny hagagan’ny rehetra nahita izany ka nampandre ny tompon’andraikitra avy hatrany.

Mipetraka irery rahalehilahy araka ny fanambaran’ny loharanom-baovao. Ny alin’io dia mbola hitan’ny olona izy. Tamin’ny fizahana ny tranony dia nidanadana be ny varavarany ary mbola nijanona teo ivelan’ny tranony ny vilany nandrahoana sy ny fatana. Ahiana noho izany ny mety ho naha-latsaka io rangahy be io tao am-bovo.