Tao Tsaramandroso, any Mahajanga no nitrangan’izany ny harivan’ny zoma teo. Vehivavy iray monina ao amin’ny toerana voalaza etsy aloha no fantatra fa nampiantrano vehivavy iray hafa mitaiza kely izay nilaza fa nisara-bady avy any Amparihilavan’i Marovoay. Nilaza ity farany fa tsy mahita aleha izy mianaka fa lavitra ny misy ny fianakaviany. Nitsetra azy ilay ramatoa tompon-trano ka nandray azy nipetraka tao aminy. Tsy ampy herinandro akory anefa dia zavatra hafa no nitranga satria vao tsy teo ny tompon-trano dia lasan’ilay vahiny avokoa ny entana rehetra tao an-trano. Hatairana tsy nisy toy izany ny an’ny tompon-trano raha nahita ny tranony bambangona tamin’ny fiverenany.  Tokony hitandrina tsara ny rehetra fa miha mitombo hatrany ny hevi-petsin’ny olona mpangalatra sy mpisoloky amin’izao fotoana izao. Tsara hohadihadiana ihany koa ny momba izay olona ampidirina an-trano mba hisorohana ny loza tahaka izao.

Laurena Nany