Fiara miisa 5 no nidofotra teny Antaninandro. Raha ny filazan’ny nanatri-maso dia fiara mijanoana avokoa izy rehetra ireo ary mifanao aloha sy aoriana. Ilay tany amin’ny farany no nisosa ho azy ary nandona ny teo alohany ka nihafara tamin’ny fifanorohan’izy rehetra. Fantatra fa maika loatra ny mpamilin’ny fiara 4×4 Renault Duster ka nanadino ny nampiakatra ny hisatra sintomina tanana rehefa nivoaka ny fiarany. Mitsotsorika anefa ilay lalana nametrahana ilay fiara ka nikorisa ho azy ilay izy avy eo ary nandona ny hafa. Somary lehibe sy mavesatra ihany koa io 4×4 io ka tsy voatohan’ilay fiara teo alohany ary lasa niteraka ny fandomana ny fiara rehetra nijanona teo. Tsy dia nisy ny fahasimbana fa pempo madinidinika ny loha sy ny taorian’ny fiara rehetra voadona. Nanamarika izay nanatri-maso fa tena misy mpanao an-tsirambina ny mpamily ary miteraka fahasimbana amin’ny fananan’ny hafa izany.