Omaly atoandro tokony ho tamin’ny 2 ora tany ho any no nisehoan’izany tetsy Antanimena. Lehilahy iray voalaza ho polisy no nitangoronan’ny fokonolona. Ity farany dia voalaza fa nanolana zazavavy kely 13 taona monja. Tsy fantatra mazava anefa ny tena fandehan’ny raharaha. Tsy fantatra ihany koa ilay zaza nolazaina fa naolan’ity lehilahy ity. Mbola tsy voamarina ihany koa ny maha-pitandro filaminana io ranamana io hatramin’izao.

Ny tena azo antoka dia ny fisian’ilay fanolanana ary io lehilahy io no nanao izany. Ilay zaza voaolana mihitsy no nitantara ny zava-nanjo azy tamin’ny ray aman-dreniny rehefa nohadihadiana ary io lehilahy lazaina fa polisy io no nanampatra ny filany taminy. Efa nitangorona ny olona ary nivonona ny hanao  fitsaram-bahoaka tamin’ity lehilahy ity. Nilaza ho tsy nahalala ny zava-nisy kosa ny mpitandro filaminana rehefa nanontaniana mikasika ity ity raharaha ity. Tsy mbola misy rahateo ny fitarainana voaray na feo mandeha henon’izy ireo mahakasika polisy voarohirohy amin’ny fanolanana.