Miseho lany ny tsy fandriampahalemana any amin ’iny Distrikan’i Moramanga iny. Olona roa no indray matin’ ny jiolahy ary telo hafa naratra tany an-toerana ny alatsinainy alina teo. Tsy vitan’izay ihany fa mbola nodoran’ireo tsy mataho-tody ny trano fonenana marobe.

Nirefodrefotra ny poa – basy tao amin’ny kaominina Manakambahiny, fokontany Ankarefona ao anatin’ny tananan’i Mandialaza. Trano miisa 3 mifanakaiky no notetezin’ireo jiolahy milanja basy tamin’izany tanàna izany. Tamin’ny fitantaran’ny ramatoa iray 47 taona anisan’ireo lasibatra izay namoy ny vadiny tamin’ny fanafihana dia niditra tao amin’ny efitrano nisy ireo zanany ireo jiolahy nanontany sady nandrahona no namono ireo ankizy ny mba hanoro ny toerana misy ireo olon-dehibe. Nohon’ny tahotra ny ho faty dia natoron’ireo zaza ireo ny efitrano nisy ny ray aman-dreniny.

Tifitra variraraka avy eo no nidiran’ireo jiolahy tao amin’izany efitrano izany ka nahavoa ny raim-pianakaviana. Niantefa teo amin’ny fony ny bala ary lavo teo noho eo izy. Ireo naratra kosa efa manaraka fitsaboana ao amin’ny hopitaly Moramanga amin’izao fotoana izao.

Laurena Nany