Vehivavy iray manodidina ny 50 taona, no voatondro ho mpamosavy teny Ambohimanarina, omaly maraina, tamin’ny 6 ora. Tsikaritry ny natory teo akaikin’ny fasana izy ka noheverin’ny fokonolona maro fa mpivoaka alina. Nodarohan’ireo mponina izy rehefa nolazaina fa nanimbazimba ny razan’olona tao anatin’ izany fasana izany. Nampangain’ny olona fa nanakan-

dalana, tovolahy miisa roa nitondra scooter avy niandry faty, ihany koa izy.

Ireto farany no nolazain’ny mponina fa nijoro vavolombelona tamin’ny zava-niseho. « Roa vavy ry zareo no niaraka, saingy tafaporitsaka ny iray. Tsy natahotra azy ireo rahateo ireo tovolahy nosakanana satria mpitandro filaminana », hoy ny resak’ireo mpivarotra tao amin’ny an-tsenan’Ambohimanarina.

Niantso ny polisy ihany ny vahoaka mba haka ilay mpamosavy nefa tsy tonga ny mpitandro filaminana ka naterin’ny olona teny amin’ ny kaomisaria Anosisoa izy.

Nanazava ny lehiben’ny polisy ao amin’ny Boroborintany fahaenina, ny kaomisera Ramarolahy Daniel Jean, fa tsy mpamosavy ilay renim-pianakaviana. « Tsy mitombina loatra ny filazana fa mpamosavy ilay ramatoa. Raha ny fahitana azy sy ny fizotry ny famotorana dia vehivavy mamo izy ity ka tsy tafody an-trano. Izy rahateo natory tsy lavitra ny fasana teo amin’ny manodidina. Ankoatra izay, tsy nipoitra tety amin’ny biraon’ny polisy mandrak’izao ireo lehilahy roa voalaza fa nosakanany », hoy hatrany ny fanazavany. Mitohy ny fanadihadiana.

L.N