Teny Ambohimangakely no nisehoan’izany tamin’ny alarobia, tokony ho tamin’ny 6ora latsaka fahefany hariva tany ho any. Moto iray nandeha mafy be no nandona ramatoa lehibe nitrotro zazakely. Nohon’ny dona dia naratra mafy avokoa izy telo saingy izy mianaka no tena voa mafy ary amin’ny fahafatesana hatramin’izao nanoratana izao.

Olona avy any Antsirabe izy ireto no tonga mialaasatra eto an-drenivohitra ka izao niharan’ny lozam-pifamoivoizana mahatsiravina izao. Nivoaka nitondra ny zafikeliny izy izao tra-doza izao. Teo am-piampitana indrindra mantsy izy ireo no voafaoka. Vaky ny lohan’ilay tovolahy nitondra ilazy fiara kodiaran-droa sady rapa ny tarehiny. Etsy ankilany, tapaka avy hatrany ny tongotr’ilay ramatoa be 62 taona ary ilay zaza kosa torana tsy nahatsiaro tena tao anatin’ny ora maro.

Fantatra ihany koa fa nahenoana fofon-toaka ity ramatoa ity tamin’ny nisehoan’ny loza. Mety tsy nijery lalana ity farany tamin’ny niampita.

L.N