Sakana tsy ahafan’ny tanora manangana zavatra ny tsy fahampiana ho entina mamorona asa. Sarotra ho azy ireo ny ahazo fepetra andeha hindrana vola izay mavesatra tokoa. Nohon’izay antony izay no nahatonga ny Jci Vohitr’Iarivo namorona ny fifaninana « Trophée de l’entreprenariat » izay natokana ho an’ny tanora. Mirona kokoa amin’ny resaka fampandrosoana sy sosialy ary fanomezana asa ny manodidina ny votoanton’ny fifaninanana.

Araka io lohahevitra io dia ireo tanora manana ny maha izy azy amin’ny sehatra famoronana izay mampiavaka azy amin’ny tontolo iasany, izay no tena tsikera mavesatra amin’ny fifaninanana. Tamin’ity andiany faharoa ity dia miisa folo ireo tanora niatrika ny fifaninanana, izay nisy avy tao Mahajanga, Toamasina ary Antsirabe. Telo mianadahy kosa ireo nananana tetik’asa tsara indrindra nahafeno ireo tsikera notadiavin’ireo mpitsara. Izy telo ireo izay miatrika ny famaranana amin’ny 26 septambra ho avy izao ary naseho ny mpanao gazety omaly teny Antaninandro.

Ny fiverenana mijery ny antontan-taratasin’ireo mpifaninana sy ny manao fitsidihana ny orinasan’izy ireo kosa no hamaritra ny iray hibata ny amboara. Ny loka ho azon’ny mpandresy amin’izany dia ny sidina mandroso miverina mankany Azia, tany mirefy 300 toran-droa eny Imerikasinina, fiofanana omen’ny minisiteran’ny tanora sy ny fanantanjahan-tena sy ny maro hafa.

L.N.