Ato ho ato dia mpianatra na mpiasa nivoaka tao amin’io ivon-toeram-pampianarana ambony momba io asan’ny mpitsabo mpanampy io no halefa hianatra sy hiasa atsy amin’ny nosy Maorisy.

An-jatony ireo mpifaninana saingy ny 22 ihany no hangatahan’ny mpiara-miombon’antoka amin’ity andiany voalohany ity. Ny fikarohana sy fanatsarana  ary fampivelarana ny tontolon’ny fahasalamam-bahoaka no anton’izany ka nahatonga ny sekoly ambony iray nikaroka fiaraha-miasa iraisam-pirenena.

Raha eto Madagasikara dia io ivon-toeram-pampianarana io irery hatreto no Oniversite nomerika misahana ny tontolon’ny fahasalamana voalohany hampiasa ny « vision conférence » ka ahafahan’ny sekoly rehetra manerana ny Nosy mametraka fomba fampianarana  sy programa tokana. Tsy vitan’izay ihany fa eo am-panatanterahana ny fandaharan’asa miahy ny fahasalamam-bahoaka eny amin’ny tontolo ambanivohitra ka ahatonga ny tahan’ny tsy fananan’asa hidina hatrany amin’ny aotra. Hisy, noho izany, ny fametrahana « poste d’infirmerie » eny amin’ny toerana tsy ahitana toeram-pitsaboana.