Mitombo isan’andro ny olona voan’ny aretina Alzheimer eto Madagasikara. Tsy mifidy sokajin-taona intsony io aretina io, fa hatramin’ny zazakely dia tratrany avokoa. Matetika dia ireo zokiolona no tena tratrany ary manomboka amin’ny faha dimam-polo taona eo izany no miseho. Sarotra anefa ny fitaizana ireo olona voan’io aretina io satria mila eo anilany mandrakariva izay olona misahana ny fanaraha-maso azy ireo. Maro amin’ireo fianakaviana no mandositra adidy satria tsy mahazaka ny vesatra miandry azy ireo. « Tsy mahazaka donam-mpiainana no tena antony mahatonga ny aretina Alzheimer. Tsy vitsy ireo olona voatery mivarotra fananana mba hividianana fanafody sy hakana mpanampy hitaiza ny havany », araka ny fanazavan’i Rason-Andriamaro Yollande, filohan’ny fikambanana Madagasikara Alzheimer. Misy azo sorohina ihany ny aretina amin’ny fitadiavana zavatra mamalifaly ireo marary mba tsy hahavery tadidy azy.  Eo anefa ireo tsy manana faharetana intsony mikarakara ny havany ka mandefa azy ireny eny amin’ny tobin’ny zokiolona voan’ny Alzheimer eny Fenomanana-Mahazoarivo nefa voafetra ihany ny fotoana hahafahany mijanona ao.

Ity septambra ity ny volana iraisam-pirenena iadiana amin’ ny aretina Alzheimer, ka  nankalazaina tamin’ny fomba ofisialy omaly, tao amin’ny « Institut des metiers de la ville » Tsarafaritra-Tsimbazaza, mitondra ny lohahevitra hoe « Miaraka tsy mifanary mitsabo tsy mifamoy fo ».

L.N