Tsy fantatra ny fotoana nisehoan’ny fanolanana fa tovovavy iray no hita faty niboridana tao amin’ny oniversite Barikadimy, any Toamasina, omaly maraina tamin’ny 10 ora. Ireo mpianatra handeha hianatra no nahatsikaritra izany.

Efa namoaka fofona ny faty sady nitangoronan’ny lalitra ka tsy nisy nahafantarana azy intsony. Tsy nisy lamba ihany koa teny an-kodiny tamin’ny fahitana azy. Vinavinaina ho mpianatra ao amin’io oniversite io ihany ilay tovovavy ary mety nody alina ka nendahan’olona sady novonoina avy eo.

Araka ny loharanom-baovao avy any an-toerana, tsy sambany izao no nahitana faty olona tao amin’ny oniversite Barikadimy,  indrindra ny tovovavy. Lasa fanafenan’ireo olon-dratsy ny asa ratsy ataony ao amin’ny tokontanin’ity ivon-toeram-pampianarana ity. Efa maro ihany koa ireo lasibatry ny asa fanendahana tao amin’io toerana io rehefa hariva iny ny andro.

Nampandre ny tompon’andraikitra mahakasika ity raharaha ity ihany ireo nahita ny razana mba hijery sy hanamarina ny nahatonga ny loza fa hatramin’ny nanoratana dia mbola tsy tonga tao an-toerana izy ireo.

Laurena Nany