Harena an-kibon’ny tany no anisan’ny mamelona ny harin-karena eo amin’ny firenena iray. Mba hahafahana mampahalala ny tanjak’i Madagasikara amin’izany lafiny izany no antony iray nanaovana ny fampirantiana momba ny harena an-kibon’ny tany sy ny solika, eny amin’ny Cci Ivato izay haharitra telo andro, nanomboka omaly ary tsy hifarana raha tsy rahampitso 25 septambra. Hetsika nokarakarain’ny « agence Coreali » izay nivondronan’ny orinasa miisa 60 izy io. Nandritra izany indrindra no nanambaran’i Lalaharisaina Joéli Valérien, minisitra misahana ny Harena an-kibon’ny tany sy ny solika fa efa maro ny fahazoan-dalana navoaka ka 500 no efa nozaraina mba hahafahan’ny olona iray manana zo mitrandraka an-kalalana. Alefa tsikelikely ihany izany, mba hijerena ireo kaompania mametraka fangatahana sy manavao.

Manaiky ny lesoka

Manaiky ny fisian’ny lesoka ny minisitra ary nilaza fa : « Mbola kely ny fiantraikan’ny fikarohana ny fitrandrahana eto Madagasikara raha eo anivon’ny fiharian-karena sy eo amin’ny fiainan’ny vahoaka.» Mba hanarenana izany dia ezahina  apetraka ao amin’ny lalàna mifehy ny fitrandrahana ny harena an-kibon’ny tany sy ny solika ny tsy maintsy hampiasan’ireo kaompania avy any ivelany tonga eto ireo malagasy ka tafiditra ao anatin’izany ny ara-tsosialy. Atao araka izay azo atao ihany koa ny famadihana ireo harena ireo ho efa voahodina no aondrana any ivelany.

L.N