Hain-trano mahatsiravina indray no nitranga tao amin’ny fokontany Antaninandro Ste Marie ao amin’ny boriborintany faha-III, ny harivan’ny alarobia 23 septambra, tamin’ny 4 ora latsaka fahaefany tany ho any. Tsy fantatra mazava izay nahatonga ny afo fa ny setroka nivoaka tao amin’ilay trano no nanaitra ny manodidina. Tsy tao an-toerana rahateo ny tompon-trano tamin’ny fotoana nisehoan’ny loza.  Mpanampy no fantatra fa miandry an’io trano io nefa mandeha mampiaraka rehefa ny alarobia hariva. Ireo mponina teo an-toerana noho izany no nifanome tanana niezaka namono ny afo mandra-pahatongan’ireo mpamonjy voina.

Nijoalajoala ny afo ka efa saika nikasoka ny tari-by mpitondra herinara’aratra an’ny Jirama. « Soa ihany fa voafehy ara-potoana fa raha tsy izany dia zava-doza no niseho », hoy ireo mponina. Tamin’ny 4 ora sy sasany tany ho any, izany hoe efa ho antsak’adiny mahery, vao tonga teny an-toerana ireo mpamono afo namarana ny asan’ireo mponina. Vokany, potika tanteraka tsy nisy noraisina intsony ireo entana tao an-trano fa may avokoa ka rindrina sisa no tavela tamin’izany. Nihotsaka hatramin’ny tafo sy ny valin-drihana mihitsy.

Laurena Nany