Ambohijatovo ambony – Nodoran’ny zaza nilalao briquet ny trano
Nisesisesy indray ny hain-trano tato ho ato. Tao anatin’ny herinandro monja dia trano roa sahady no may kila firehitra teto an-drenivohitra. Ny tsy fitandremana no tena antony mahatonga azy ireny. Omaly, tokony ho tamin’ny 11 ora sy sasany maraina, trano iray misy rihana no tra-doza teny ambonin’ny tonelina Ambanidia. Araka ny fanambaran’ny mpamonjy voina dia ankizy kely nilalao « briquet » no nahatonga ny afo. Nahazo entana mora mirehitra izany ka vetivety dia niitatra eran’ny trano. Nanavotra aina nivoaka teny ivelany avokoa ireo tompon-trano vao nahita ny fijoalajoalan’ny afo ary nampandre ny mpamonjy voina avy eo. Tonga teny an-toerana ireto farany, nefa nanahirana azy ireo ihany ny famonoana ny afo noho ilay trano nisy rihana sy ny fitsokan’ny rivotra mafy be. Tsy nisy ny aina nafoy na naratra fa ireo entana tany amin’ny rihana ambony no potika tanteraka tsy nisy noraisina.
Raha tsiahivina dia trano iray misy rihana ihany koa no levon’ny afo ny harivan’ny alarobia, lasa teo, tokony ho tamin’ny 4 ora sy sasany, tao Antaninandro Ste Marie. Tsy fantatra ny nahatonga ny loza tamin’izay fa efa lel’afo nijoalajoala saika hikasoka ny tari-by mitondra herin’aratra no nanaitra ny manodidina. Potika tsy nisy noraisina ny entana rehetra tamin’izany ary rindrina sisa tavela.
Laurena Nany