Toliara – Notafihan’ny miaramila ny zandary
Tezitra ny vahoakan’i Toliara nanoloana ny fihoaram-pefy nataon’ireo miaramila mampandry tany any Atsimo amin’ny hetsika fahalemana hiadiana amin’ny asan-dahalo. Ny sabotsy maraim-be, tamin’ny 4 ora, dia nidiran’ireo miaramila mpampandry tany, avy any Sakaraha sy Ankazoabo, miisa 20 mahery nirongo basy, nandeha kamiao, an-keriny ny tranon’ny kolonelin’ny zandary iray monina ao Anketa Toliara.
Tondro molotra
Raha ny loharanom-baovaon’ireo miaramila dia voalaza fa manafina lehiben-dahalo iray malaza antsoina hoe Regana ao an-tranony ity manam-boninahitra ambonin’ny zandary ity. Rehefa avy namaky ny varavarana lehibe miisa roa ireo mpampandry tany dia nisava ny efitrano rehetra, nefa tsy nisy afa-tsy ity kolonely ity sy ny zanany no tao an-trano. Rehefa tsy nahita ilay lehiben-dahalo notadiaviny ireto miaramila dia nentin’izy ireo ny zanak’ity kolonely ity, avy eo naverina.
Nifona ny fitondram-panjakana
Nanoloana ity zava-nitranga ity izay nohelohin’ny vahoakan’i Toliara, dia tonga nifona ary nanao fomba ara-drazana tao an-tranon’ity kolonely ity, omaly naraina, ny iraky ny fitondram-panjakana foibe notarihan’ny sekretera jeneraly miadidy ny zandarimariam-pirenena, ny Jly Paza Didier Gérard sy ny CEMGAM ary ny avy ao amin’ny fiadidiana ny Repoblika, izay nanolotra omby roa sy vola 5 tapitrisa ariary.
Hosaziana mafy ny miaramila nihoa-pefy. « Mba hisian’ny fitoniana dia nandefitra sy namela heloka izahay, na dia mafy aza ny zava-nihatra taminay », hoy ny Kolonely Rabe Jules nitafa tamin’ny mpanao gazety. « Resy lahatra izahay fa nisy ny fandikan-dalàna ka natao izao fifonana ampahibemaso izao ho famitranam-pihavanana, ary hosaziana mafy ireo miaramila nihoa-pefy fa manaratsy endrika ny fianakaviam-ben’ny mpitandro filaminana », hoy ny CEMGAM, ny Jeneraly Rasolonjatovo Beni Xavier.
Eric Toliara