Tsy mijanona amin’ny fanaovana asa soa ara-tsosialy ihany ny fikambanana Tanora Mian-tsehatra tarihin’ny filoha nasionaliny, Benjamina Randriamahefa, fa manome lanja, ihany koa, ny fanabeazana ny tanora mba hialana amin’ny fidonadonam-poana sy hiadiana amin’ny fidorohana zava-mahadomelina mahazo laka amin’izao ao Toliara.

Nisy ny « tournoi de vacance » taranja basikety lahy sy vavy nokarakarain’ny fikambanana TAMIA nanomboka ny 5 septambra lasa teo, nandraisan’ny ekipa 16 ao Toliara anjara izay notolorana baiboly avokoa.

Lalao famaranana niavaka

Ny asabotsy teo ny lalao famaranana notanterahina tao amin’ny kianjan’ny Tanora sy ny fanatanjahan-tena Ankilifaly notronon’ny SG-ny TAMIA. Tompon-daka teo amin’ny sokajy zazavavy ny ekipan’ny « Scorpion rouge » izay nandresy ny « Sky’s » tamin’ny isa 29 no 16. Nitondra ny loka nody tamin’ny isa hety dia hety 56 no 55 kosa ny ekipan’ny Tandem nandavo ny  Sans fil Miray.

Sady fialamboly no fitaizana

« Fialamboly sady fitaizana ny tanjon’ny hetsika, ka tsy tokony ho olana intsony manomboka izao eo anivon’ny fiaraha-monina ny tanora raha beazina hanana toe-tsaina matahotra an’ Andriamanitra tsy hiantehitra foana amin’ny takalo sy fitiavan-tena rehefa misy zavatra atao, fa tokony hibanjina ny tombotsoa iraisana hiadiana amin’ny firongatry ny asa ratsy mahazo laka amin’izao », hoy Randrianantenaina Jean Felix, mpandrindram-paritry ny TAMIA faritra Atsimo Andrefana.

Eric Toliara