Dahalo iray no matin’ny fokonolona tany amin’ny kaominina Bekopaka, faritra Boeny ny faran’ny herinandro lasa teo. Dahalo miisa 12, nirongo basy sy fitaovam-piadiana hafa, no nanafika tao an-tanàna tamin’io andro io ka lasan’izy ireo ny omby marobe. Nanao fanarahan-dia ny fokonolona, nampian’ny zandary miisa 4, ka raikitra ny fifandonana. Nahery setra ireo dahalo saingy kizitina ihany koa ireo vahoaka ka taorian’ny ady nahery vaika dia lehilahy miisa roa avy amin’ny fokonolona no naratra mafy ary maty tsy tra-drano kosa ny dahalo iray ka tafaverina avokoa ny omby rehetra.

Tena efa manao vy very ny ainy tanteraka ny vahoaka eny ifotony amin’izao fotoana izao ho fiarovana ny ainy sy ny fananany. Manao izay ho afany, ihany koa, ny zandary saingy tsy afa-manoatra firy satria vitsy an’isa hatrany izy ireny no mamita asa any amin’ny faritra lavitra hanjakan’ny tsy fandriam-pahalemana.

Ny fitondram-panjakana foibe anefa tsy mandefa tafika mpampandry tany manokana raha tsy efa misy mpitandro filaminana maro matin’ny dahalo. Mila mandray fanapahan-kevitra hentitra ary ho an’ny faritra rehetra ny Fanjakana satria efa tena samy manao sorona ny ainy mihitsy ny fokonolona sy ny zandary vitsy an’isa any ambany ravinahitra rehetra any amin’ny fiadiana amin’ny asan-dahalo.

Dom