Tovolahy iray 21 taona no maty voatifitry ny miaramilan’ny Das, tao amin’ny fokontany Mahamanina, kaominina Anosibe Ilanja, distrikan’i Miarinarivo, ny faran’ny herinandro teo. Nandritra ny lalao ara-panatanjahan-tena tao an-toerana no nitrangan’izany, izay nisy ny miaramila natao nandrindra ny filaminana. Nandritra ny lalao anefa dia nisy savorovoro tampoka, noho ny tsy fitovian-kevitra, teo amin’ireo mpanotrona.

Mba hanaparitahana ireo niady  dia nanao tifi-danitra in-telo ny mpitandro filaminana fa izy indray avy eo no nitangoronan’ireo olona. Nisy tamin’ireto farany no nikasa haka an-keriny ny basy teny aminy.  Teo indrindra no lasa tsy nahy ny tifitra ka nahavoa ilay ankizilahy. Nifamonjena nentina teny amin’ny hopitaly tao an-toerana ihany ilay tovolahy fa noho ny ratra nahazo azy dia namoy ny ainy ity farany.