Miisa 62 mirahavavy eo anivon’ny Skotisma zazavavy malagasy (Szm) no niatrika fiofanana teto an-drenivohitra, tao Ankadikely Ilafy (Fo.fi.kri), ny 25 hatramin’ny 30 septambra teo, nandritra ny hadimiana, izay notarihin’ny filohan’ny Szm, Falinirina Raharimanana. Ny tanjon’ny fiofanana dia ny ho tonga eny amin’ny « tendrom-pahombiazana » izay nofakafakaina nandritra ny dimy andro.

Fiofanan’ireo mpiofana ho mpampiofana izay sambany vao nisy teto Madagasikara teo amin’ny tantaran’ny federasionan’ny Skotisma zazavavy ity fiofanana fara-tampony ity. Samy manana ny ambaratongam-piofanany avy ireo fikambanana telo mivondrona ao anatiny raha TP4 na « Tapa-porohana efatra » ho an’ny Kiadin’i Madagasikara, « trèfle 3 » ho an’ny Mpanazava eto Madagasikara ary « Felan’efatra » na Fenef kosa ho an’ny Fanilon’i Madagasikara, izay efa nahavita « FETE » avokoa no nisolontena ny fikambanana tao ary nahatonga avokoa ny avy any amin’ny faritra samihafa manerana ny Nosy.